Ўзбекистонда бир тонна цемент нархининг жорий йилдаги энг қуйи кўрсаткичи қайд этилди

Тошкент. 8 август. ЎзТАГ – 2014 йилнинг августи бошига келиб, Ўзбекистондаги биржа цемент бозорида ПЦ400 Д-0 маркадаги цементнинг сотув баҳоси тоннасига 329 минг сўм даражасида қайд этилиб, бу жорий йил бошидан бери энг қуйи кўрсаткичдир, дея хабар беради Ўзбек телеграф агентлиги (ЎзТАГ).

ЎзРТХАБдан хабар қилишларича, жорий йилнинг биринчи чорагида ПЦ400 Д-0 маркадаги цементнинг ўртача сотилиш нархи 433 минг сўм миқдорда бўлган.

2013 йилнинг биринчи чорагида эса бунга тескари ҳолат кузатилган ва ушбу хилдаги цемент баҳоси тоннасига 314 минг сўмдан 504 минг сўмгача ўсган эди. Максимал кўрсаткич – тоннасига 546 минг сўм эса ўтган йилнинг июлида кузатилган эди.

Бозор иштирокчиларининг фикрига кўра, Д-0 маркаси нархларининг пасайиши сотувга қўйилган цемент ҳажми билан боғлиқ. Жорий йилда 126 минг тонна ана шу маркадаги цемент сотувга қўйилди, бу эса ўтган йилнинг муқобил давридагига қараганда икки баравар юқори.

Сотилган маҳсулотнинг 95% “Қизилқумцемент” АЖ, 4% ёки 4,9 минг тоннаси “Бекободцемент” АЖ томонидан реализация қилинди.

$1 = 2336,20 сўм.