Ўзбекистонда бизнесни кечаю-кундуз онлайн рўйхатга олиш тизими жорий этилади
Тошкент. 16 ноябр. ЎзТАГ – 2017 йилнинг 1 апрелидан Ўзбекистонда бизнесни рўйхатга олиш кечаю-кундуз ва онлайн режимда жорий этилади, деб хабар беради Ўзбек телеграф агентлиги (ЎзТАГ).
Бу Ўзбекистон Республикаси Президентининг 2016 йил 28 октябрдаги “Тадбиркорлик субъектларини давлат рўйхатидан ўтказиш ва ҳисобга қўйиш тартибини тубдан такомиллаштириш бўйича чора-тадбирлар комплекси” Қарорида акс этган.
Тадбиркорлик субъектларини давлат рўйхатидан ўтказиш ва ҳисобга қўйиш, - банклар вакредит бюролари, уларнинг филиаллари ва ваколатхоналари ҳамда ННТ бундан мустасно, - кечаю кундуз Интернет тармоғидаги ЯИДХПга интеграциялашган автоматлаштирилган тизим орқали амалга оширилади.
Қарорга мувофиқ, қонунчиликка қатор ўзгартиришлар киритиш кўзда тутилган. Хусусан, рўйхатга олувчи органга кичик бизнес субъектлари томонидан тақдим этиладиган замонавий талабларга жавоб бермайдиган ҳужжатлар ва (ёки) маълумотларни топшириш бўйича талабларни бекор қилинади (муҳр ва бурчак тамғаси эскизлари, фотокарточкалар, паспорт нусхаси, рўйхатга олиш тартиботларидан ўтганлик (рухсат берувчи) карточкаси, якка тартибдаги тадбиркорнинг яшаш жойидаги ўзини ўзи бошқариш органининг тасдиқловчи маълумотномалари, фирма номи захирага олинганлигини тасдиқлайдиган ягона логин ва пароль ва ҳ.к.)
Шунингдек, чет эл инвестициялари иштирокидаги корхона ва хорижий сармоя иштирокидаги бошқа корхоналарни давлат рўйхатидан ўтказишда таъсис ҳужжатларини нотариал тасдиқлаш, хорижий муассис тўғрисида юридик шахс рўйхатдан ўтказилган жойдаги савдо реестридан кўчирма ва унинг фаолиятини тасдиқлайдиган бошқа ҳужжатлар бўйича талаблар бекор қилинади.
Хужжатга мувофиқ, “ягона дарча” ягона марказлари орқали товарларни олиб кириш (импорт) билан боғлиқ тадбиркорлик фаолиятини амалга ошираётган жисмоний шахсларни давлат рўйхатидан ўтказади. Бундан ташқари, Интернет орқали давлат рўйхатидан ўтадиган тадбиркорлик субъектлари учун давлат божлари ставкаларини амалдагисидан икки баробар тушириш режалаштирилмоқда.
