Ўзбекистонда Бухоро-Мискен темирйўл линияси фойдаланишга топширилди
Тошкент. 4 декабр. ЎзТАГ – Ўзбекистонда Бухоро-Мискен янги темирйўл линиясининг очилиши ва фойдаланишга топширилишига бағишланган тантанали маросим бўлиб ўтди, деб хабар беради Ўзбек телеграф агентлиги (ЎзТАГ).
“Ўзбекистон темир йўллари” АЖ маълумотига кўра, бир йил олдин, 2016 йил декабрь ойида Бухородан Мискенга янги темирйўл линияси қурилиши бошланган эди. Қурилиш ишлари 355 километрлик линиянинг икки томонидан бир пайтнинг ўзида бошланган эди.
Янги темирйўл линиясининг очилиши натижасида Тошкент ва Урганч орасидаги масофа 75 кмга қисқарди. Шу пайтга қадар Тошкент шаҳридан Урганчга қатновчи поездлар Навоий – Учқудуқ – Мискен магистрали орқали 1064 километр йўл босар эди.
Қурилиш давомида қарийб 22 миллион кубометрлик тупроқ ишлари бажарилди. 121 сунъий иншоот, 12 кўприк ва 6 йўл ўтказгич, 5 станция (Янгиобод, Тузтепа, Учачик, Сузакдор, Даутепа) ва 5 разъезд (Машак, Азанир, Алабуга, Жакасай, Акчука) барпо этилди. Бунёдкорлик ишларига 2 мингга яқин ишчи-мутахассис, мингдан зиёд қудратли замонавий техника ва механизмлар жалб этилди.
Фойдаланиш технологиясига мувофиқ, ҳозирча бу йўлда юк поездлари ҳаракатланади. Бу эса мазкур ҳудуддаги қазилма бойликларини ўзлаштириш, улардан самарали фойдаланиш ва шу билан бирга янги ишлаб чиқариш корхоналарини очишга хизмат қилади.
Истиқболда янги темир йўлдан “Afrosiyob” тезюрар электропоезди қатнови йўлга қўйилади. Натижада Тошкент – Самарқанд – Навоий – Бухоро – Урганч йўналишида туристлар учун қулай шароитлар яратилади.
