Ўзбекистонда чиқарилган янги электрон дарсликларни Google Playдан юклаб олиш мумкин
Тошкент. 27 июн. ЎзТАГ – Яқинда Ўзбекистонда ишлаб чиқилган ва умумтаълим дарсликларини мобил телефонлар ва планшетларда ўқиш имконини берувчи “e-Darslik” мобиль иловасини эндиликда Google Playдан юклаб олиш мумкин, дея хабар беради Ўзбек телеграф агентлиги (ЎзТАГ).
Uzinfocom марказидан хабар беришларича, Global Solutions компанияси билан ҳамкорликда ишлаб чиқилган иловани бунга қадар ZiyoNET таълим тармоғидан юклаб олиш мумкин эди.
Шунингдек, дастур ижодкорлари яқинда юқоридаги илованинг Apple iOS қурилмалари учун версиясини ҳам ишлаб чиқиб, уни AppStoreга жойлаштиришларини маълум қилдилар.
Илова ўзбек ва рус тилларида яратилган. Иловада мобиль қурилмаларда ўқиш қулай бўлган 40 зиёд дарсликлар юклаб олиш учун махсус форматда жойлаштирилган. Бу ердаги исталган дарсликни қурилмага юклаб олиб ўқиш мумкин.
Дарсликларни қидириш учун дарслик тили ва синфни кўрсатувчи фильтрдан фойдаланиш мумкин. Зарур дарсликлар танлаб олингандан кейин улар телефонга юкланади ва дарсликдан интернетга уланмасдан фойдаланиш мумкин бўлади.
