Ўзбекистонда Coca-Cola ишлаб чиқарувчи компания ҳудудий корхоналарини сотишни режалаштирмоқда
Тошкент. 18 август. ЎзТАГ – “Coca-Cola ichimligi Uzbekiston, LTD” МЧЖ Қашқадарё ва Сурхондарё вилоятларида жойлашган ўз корхоналарини очиқ аукцион савдоларида сотишни режалаштирмоқда, деб хабар беради Ўзбек телеграф агентлиги (ЎзТАГ).
“Биржа” газетаси маълумотларига кўра, “Qashqadaryo salqin ichimliklari” (Қашқадарё вилояти) МЧЖ 100-фоизлик улуши 394,3 млн сўм бошланғич қиймат билан сотувга қўйилган. “Surxon salqin ichimliklari” МЧЖ (Сурхондарё вилояти) шунча улуш 398,2 млн сўмга баҳоланмоқда.
Савдода қатнашишни истаган инвестор объект бошланғич қийматининг 10% миқдорида гаров пулини савдо ташкилотчиси “Respublika mulk markazi” АЖ ҳисобига ўтказиши керак.
Маълумот ўрнида, “Coca-Cola Ichimligi Uzbekiston, LTD” ҚК МЧЖ расмий очилиши 1994 йил мартда бўлиб ўтган. Корхона Тошкент шаҳрида жойлашган. 1996 йилда компания Тошкент вилоятида яна бир ишлаб чиқариш цехини ишга туширган. 1997 йилда Наманган ва Хоразм вилоятларида яна 2 завод ишга туширилган.
$1 = 2590,38 сўм
