Ўзбекистонда далилларни қалбакилаштириш учун жиноий жавобгарлик жорий этилди

Тошкент. 2 апрел. ЎзТАГ – Ўзбекистонда далилларни қалбакилаштирганлик (сохталаштирилганлик) учун жиноий жавобгарлик ўрнатилмоқда, ёлғон гувоҳлик ва ёлғон хабар берганлик учун жиноий жавобгарлик белгиланмоқда, деб хабар беради Ўзбек телеграф агентлиги (ЎзТАГ).

Бу “Суд-тергов фаолиятида фуқароларнинг ҳуқуқ ва эркинликлари кафолатларини кучайтириш бўйича чора-тадбирлар қабул қилинганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Ўзбекистон Республикасининг Қонуни билан кўзда тутилган.

Қонун Олий Мажлиси Сенатининг ўн тўртинчи ялпи мажлисида кўриб чиқилди ва маъқулланди.

Сенат матбуот хизмати хабарига кўра, қонунга хилоф усуллар орқали ёки жиноят процесси иштирокчиларини қонун билан кафолатланган ҳуқуқларидан маҳрум қилиш ёки бу ҳуқуқларни чеклаш йўли билан олинган маълумотларни далил-исботлар сифатида фойдаланишни тақиқловчи тегишли норма киритилмоқда.

Шунингдек, судларда жиноят ишларининг ошкора кўрилиши принципини чеклайдиган қўшимча талабларни жорий этиш тақиқланмоқда, қийноққа солиш ва бошқа шафқатсиз, ғайриинсоний ёки қадр-қимматни камситувчи муомала турларини қўллаганлик учун жавобгарлик кучайтирилмоқда.

Бундан ташқари, қонунда сиртдан қамоққа олиш тарзидаги эҳтиёт чораси қўлланилган шахсларнинг мазкур эҳтиёт чораси устидан суд тартибида шикоят қилишга доир ҳуқуқлари, шунингдек ҳимоячининг далилларни тўплаш ва тақдим этишга доир ҳуқуқлари кенгайтирилмоқда, ҳодиса содир бўлган жойни кўздан кечириш жараёни, тергов эксперименти албатта видеога олиниши, шунингдек суд текшируви жараёнида стенографик ёзув олиб борилиши ҳақидаги талаб жорий этилмоқда.

Далилларни тўплаш ва мустаҳкамлашда рухсат берилмаган усуллар қўлланилганлиги тўғрисидаги мурожаатлар суд-тиббий экспертизаси ёки бошқа экспертиза ўтказилган ҳолда прокурор ёки суд томонидан албатта текширилиши лозимлигини назарда тутувчи тартиб ўрнатилмоқда.

Шунингдек, қонунда озодликдан маҳрум қилиш тариқасидаги жазони ўтаётган, қамоқда сақланаётган, ушлаб турилган ёки маъмурий қамоққа тортилган шахслардан жиноятлар тўғрисида олинган аризалар, хабарларни ва бошқа маълумотларни дарҳол рўйхатга олиш ва ҳал этишда жиноят-процессуал қонун ҳужжатлари талабларига риоя этилаётганлиги прокурор томонидан мажбурий тарзда текширилиши ҳақидаги нормалар жорий қилинмоқда.

Сурат манбаи: http://today.kz/news/proisshestviya/2016-03-30/713320-zhitel-semeya-spyanu-zabyil-o-priparkovannom-avtomobile-i-zayavil-ob-ugone/