Ўзбекистонда электрон лицензиялар бериш тизими 2018 йилга бориб тўлақонли ишга тушади
Тошкент. 7 апрел. ЎзТАГ – Тадбиркорлик фаолиятини лицензиялашда интерактив хизматларни кўрсатувчи ва рухсат берувчи жараёнлар автоматлаштирилган “Лицензия” ахборот тизимлари комплекси 2018 йилга бориб тўлақонли ишга тушади, деб хабар беради Ўзбек телеграф агентлиги (ЎзТАГ).
“Лицензия” ахборот тизими фуқаро ва ташкилотларга лицензияланадиган фаолият турлари ва тухсат бериш тартиблари, уларни расмийлаштириш тартиблари, берилган лицензиялар, улар муддат ва мақоми ҳақида маълумот беради.
“Тизим ёрдамида лицензия ва рухсатномалар олиш учун электрон шаклда ариза топшириш мумкин. Бундан ташқари, лицензиялаш органларининг тадбиркорлар билан ишлаш самарадорлиги ошади”, - деб таъкидлашди Ахборот технологиялари вазирлигида.
Эслатиб ўтамизки, 2016 йилнинг декабр ойидан синов режимида ишга туширилган мазкур “Лицензия” ахборот тизимлари бугунда синов тариқасида ишламоқда. У орқали бугунги кунгача 600 га яқин аризалар қайта ишланган ва 41 мингдан зиёд лицензиялар ва рухсатномалар реестри киритилган.
Ҳозирги кунда мазкур портал орқали 40 та фаолият тури бўйича лицензия ва рухсатномалар олиш учун электрон шаклда ариза топшириш, аризани кўриб чиқиш ҳолатларини кузатиб бориш, лицензиялаш ва рухсатномалар бериш жараёнларини автоматлаштирилган ҳолда амалга ошириш имкониятлари яратилган. Жумладан, айни пайтда тадбиркорларга транспорт, архитектура ва қурилиш, биржа, кўчмас мулк, савдо, тиббиёт, дорихона, таълим, маданият, спорт, туризм ва реклама каби ёъналишларда фаолият олиб боришлари учун лицензиялар электрон усулда тақдим этилмоқда.
