Ўзбекистонда электровелосипедлар ишлаб чиқарила бошланди

Тошкент. 12 май. ЎзТАГ – Ўзбекистонда электровелосипедлар ишлаб чиқарила бошланди. Ана шундай велосипедларнинг 250 доналик биринчи партияси сотувга чиқарилди, дея хабар беради Ўзбек телеграф агентлиги (ЎзТАГ) мамлакат ОАВ хабарларига асосланган ҳолда.
Ушбу транспорт воситасини ишлаб чиқариш Наманган вилоятининг Норин туманидаги “Norin mechanikal plant” МЧЖда йўлга қўйилган. Мазкур электровелосипедлар замонавий аккумулятор батареялари билан жиҳозланган.
Электровелосипедларнинг яна бир қулайлиги, уларда жисмоний босимдан керагича фойдаланиш мумкин. Кейинги 2 йил ичида Тошкентда пайдо бўлган велосипед ижараси нуқталарининг оммалашгани ушбу транспорт турига мамлакатда талаб катталигини кўрсатмоқда. Бундан ташқари, жорий йилда Тошкентда махсус велойўлакча ҳам очилиши режалаштирилган. Бу шаҳардан ўтувчи Анҳор каналининг реконструкция режасида кўзда тутилган.
“Norin mechanical plant” МЧЖнинг асосий иши Асакадаги GM Uzbekistan ҚК учун бутловчиқ қисмлар ишлаб чиқариш ҳисобланади. 2012 йилдан бери бу ерда хитой технологияси асосида велосипедлар ишлаб чиқариш ҳам йўлга қўйилган.