Ўзбекистонда энг яхши олий ўқув юртларининг янги рейтинги эълон қилинди
Тошкент. 8 август. ЎзТАГ - Ўзбекистонда энг яхши ОТМларнинг янги рейтинги эълон қилинди, дея хабар беради Ўзбек телеграф агентлиги (ЎзТАГ).
Вазирлар Маҳкамаси ҳузуридаги Таълим сифатини назорат қилиш давлат инспекциясининг маълумотларига кўра, Ўзбекистон миллий университети тўплаган балларнинг 69,02% билан мамлакатнинг энг яхши олий ўқув юртлари рейтингида биринчи ўринни эгаллади.
Рейтингнинг кейинги ўринларида Тошкент ирригация ва қишлоқ хўжалиги мелиорация муҳандислари институти (68,96%) ва Самарқанд давлат университети (52,89%) жойлашган. Шунингдек, Тошкент ахборот технологиялари университети ва Тошкент темир йўл муҳандислари институти ҳам рўйхатга кирган.
Рейтингда сўнгги уч ўринни Гулистон давлат университети (33,47%), Қўқон давлат педагогика институти (33,41%) ва Жиззах давлат педагогика институти (31,07%) эгаллади.
Қайд этилганидек, рейтинг 2019 йил февраль-июнь ойларида ўтказилган 57 та Ўзбекистон олий таълим муассасалари фаолиятини таҳлил қилишга асосланган. Институт ва университетларнинг фаолияти 41 мезон бўйича кўриб чиқилган эди.
Эслатиб ўтамиз, 2018 йилда Ўзбекистон Республикаси Вазирлар Маҳкамаси ҳузуридаги таълим сифатини назорат қилиш давлат инспекцияси мамлакатнинг энг яхши олий ўқув юртлари рўйхатини тузди. Биринчи ўринни Ўзбекистон Миллий университети, охирги ўринни Қўқон педагогика институти эгаллади. Сентябрь ойида Адлия вазирлиги ушбу рейтингни танқид қилиб, унинг натижаларини бекор қилди.
Олий таълим вазирлиги маълумотларига кўра, бугунги кунда Ўзбекистонда 109 та олий таълим муассасаси, жумладан, 30 та университет, 35 та институт, иккита академия, битта консерватория, битта олий мактаб, 29 та маҳаллий олий ўқув юртларининг филиаллари ва 7 та хорижий таълим муассасалари фаолият кўрсатмоқда.
Сурат манбаи: oka.fm
