Ўзбекистонда ЕТТБ билан биргаликда Хорижий инвесторлар кенгаши ташкил этилмоқда

Тошкент. 8 феврал. ЎзТАГ – Ўзбекистонда ЕТТБ билан биргаликда президент Шавкат Мирзиёев раислигида Хорижий инвесторлар кенгаши ташкил этилмоқда, деб хабар беради Ўзбек телеграф агентлиги (ЎзТАГ).

Кенгашнинг биринчи йиғилишини 2019 йилнинг I ярмида ўтказиш масалалари Тошкентда Инвестициялар ва ташқи савдо вазири Сардор Умурзоқовнинг Европа тикланиш ва тараққиёт банки Марказий Осиё бўйича бошқарувчи директори Бруно Бальванера билан музокараларда муҳокама қилинди.

Кенгаш йиғилиши доирасида ЕТТБ президенти Сума Чакрабартининг Ўзбекистонга ташрифи ҳам режалаштирилмоқда.

Кенгаш фаолияти ҳукумат учун инвестиция муҳитини яхшилаш, қулай ва шаффоф ишбилармонлик муҳитини шакклантириш, сармояларни жалб қилишга кўмаклашиш бўйича аниқ тавсиялар ишлаб чиқишга йўналтирилади. Унинг таркибига Ўзбекистон ҳукумати, ЕТТБ, бошқа хорижий банклар ва молия институтлари, Савдо-саноат палатаси, маҳаллий бизнес-ассоциасялар вакиллари кириши кўзда тутилмоқда.

Бугунги кунда ЕТТБ билан умумий қиймати $622,5 млнлик еттита лойиҳа бўйича заём битимлари имзоланган. Улар пойтахт ва республиканинг бошқа ҳудудларида сув таъминоти ва марказлашган иссиқлик таъминоти тизимини яхшилаш, шунингдек, электр энергетикаси соҳасини модернизация қилишга қаратилган.

2019 йилда ЕТТБ ва Ўзбекистоннинг ҳамкорлиги доирасида инвестиция портфелининг кенгайиши ва энг истиқболли тармоқларда лойиҳаларни амалга ошириш учун қўшимча молилаштиришнинг жалб қилиниши кутилмоқда.

Сурат манбаи: https://kursiv.kz