Ўзбекистонда флоат-технология бўйича ойна ишлаб чиқарилади

Тошкент. 30 июн. ЎзТАГ – Фарғона вилоятидаги “Кварц” АЖ базасида флоат-технология бўйича ойна ишлаб чиқариш йўлга қўйилади, деб хабар беради Ўзбек телеграф агентлиги (ЎзТАГ).

“Ўзқурилишматериаллари” АЖ маълумотига кўра, бугунги кунда бутун дунёда замонавий текис ойналар ишлаб чиқариш ишлари флоат-технологияга асослангандир. Ушбу услуб маҳсулотнинг ва технологик линияларнинг юқори сифатини таъминлайди.

Лойиҳанинг умумий қиймати $60 млн бўлиб, бундан $16 млни хорижий инвестициялардир. Лойиҳани амалга ошириш муддати 2018-2019 йилларга мўлжалланган. Ишлаб чиқариш қуввати кунига 400 тонна ойнани ташкил этади. Маҳсулотнинг 70% ички бозорга, 30% экспортга чиқарилиши мўлжалланмоқда. Янги корхонада 258 иш жойлари яратилади.

Флоат-услуби А.Пилкингтон томонидан 1952 йилда Англияда яратилган бўлиб, ҳозирга қадар Pilkington ширкати томонидан такомиллаштирилмоқда. Уни қўллаш бир вақтда харажатларни камайтиришга ҳам имкон беради.