Ўзбекистонда газеталарга онлайн обунани жорий қилиш режалаштирилмоқда
Тошкент. 25 сентябр. ЎзТАГ – Октябрда Тошкент почта хизмати ўз сайти орқали онлайн обуна хизматини жорий этишни режалаштирмоқда. Янги хизмат “Ўзбекистон почтаси” АКнинг ICTExpo-2014 кўргазмасидаги стендида намойиш этилди, дея хабар беради Ўзбек телеграф агентлиги (ЎзТАГ).
“Тошкент почтамти” филиали инженери Виктор Нерадовнинг сўзларига кўра, ҳозирда онлайн-обуна синов тарзида жорий этилган. Кейинчалик ушбу хизматдан пластик онлайн-картага эга бўлиб, “sms орқали хабар” хизматига уланган барча фойдаланиши мумкин бўлади.
Интернет-обуна www.pochta.uz сайтидаги “электрон обуна” бўлими орқали амалга оширилади.
Эслатиб ўтамизки, Ўзбекистонда почта алоқаси хизмати “Ўзбекистон почтаси” АК томонидан бошқарилади. У 14 ҳудудий филиал, 177 туман ва шаҳар узеллари, 2,986 алоқа бўлимларидан ташкил топган. Шундан 2,296 алоқа бўлими қишлоқ ерларида жойлашган. Шунингдек, компания таркибига “Халкаро почтамт” ихтисослашган филиали, “Ўзбекистон маркаси” корхонаси ва “Пул ўтказишларини назорат қилиш маркази” киради.
Миллий почта оператори таркибига яна 34 авиа-, 2 темир йўл, 436 автомобил маршрутлари кириб, улар почта жўнатмаларини етказиб бериш билан шуғулланади.
