Ўзбекистонда икки экстремистга ҳукм ўқилди
Тошкент. 14 сентябр. ЎзТАГ – Жиноят ишлари бўйича Самарқанд вилоят суди Ургут туманида яшаб, Ўзбекистонда шариат асосида теократик давлатни зўравонлик билан қуриш тарафдори бўлган икки кишига нисбатан қўзғатилган ишни кўриб чиқди, деб хабар беради Ўзбек телеграф агентлиги (ЎзТАГ).
Суд муассассига кўра, Ургут туманида яшаган ота ва ўғил Жамолиддин ва Ҳасан Пирматовлар Санкт-Петербургда меҳнат муҳожирлиги пайтида “Ислом жиҳодчилари” радикал гуруҳи вакилларининг салбий таъсирига тушиб қолишган, экстремистик материаллар, жиҳод қилишга ва исломий халифалик қуришга даъват қилувчи материалларни ўргана бошлаганлар.
Улар Интернетдан “Ўзбекистон Исломий Ҳаракати” террористик ташкилоти асосчиси Тоҳир Йўлдошев ва диний фундаментализм ва экстремизм ғоялари тарғиб қилувчи бошқа шахсларнинг чиқишларини тинглашган ва юклаб олишган.
“Кўрсатилган шахслар Марказий Осиё минтақаси давлатларига мансуб бошқа ҳамфикрлари билан бирга жиҳод орқали Сурияда жанг қилаётган халқаро террористик тўдаларга қўшилишни ният қилишган. Улар Россия Федерациясида бўлган ҳолда оммавий ижтимоий тармоқлар орқали диний экстремизм ғояларини тарғиб қилишган ва қариндошлари ва танишларини Ўзбекистонда халифалик қуриш учун муқаддас уруш олиб боришга чақиришган”, - деб таъкидланади суд хабарида.
Ўзбекистон ва РФ махсус хизматлари томонидан ўтказилган тезкор тергов ва махсус амалиётлар натижасида уларнинг ноқонуний фаолияти тўхтатилди. Ота ва ўғил қўлга олиниб, Ўзбекистонга депортация қилинди.
Суд, иш материаллари ўрганиб чиққан ва гувоҳларни эшитган ҳолда Ҳ.Пирматовни Жиноят кодексининг бир қатор моддалари бўйича 10 йилга, Ж.Пирматовни эса 8 йилга озодликдан маҳрум қилишга ҳукм чиқарди.
