Ўзбекистонда илмий инглиз тилини ўрганиш учун тил қўлланмаси яратилди
Тошкент. 14 апрел. ЎзТАГ – Тошкентда академик (илмий) инглиз тилини ўрганишга мослаб ишлаб чиқилган “B2 Ready” қўлланмасининг тақдимот маросими бўлиб ўтди, деб хабар беради Ўзбек телеграф агентлиги (ЎзТАГ).
АҚШнинг Ўзбекистондаги элчихонасидан маълум қилишларча, Ўзбекистонда узлуксиз таълим барча босқичлари учун янги авлод дарсликларини яратиш кетмоқда. Инглиз тили қўлланмалари бўйича лойиҳалардан бири Чет тилларни ўқитишнинг инновациявий методикаларини ривожлантириш Республика илмий-амалий маркази томонидан ишлаб чиқилди. Лойиҳа америка дипвакиллиги томонидан қўллаб қуватланди.
Лойиҳа доирасида бунинг учун махсус таклиф этилган АҚШлик мутахассис Ди Бротон инглиз тилида турли соҳа ва йўналишлар бўйича дарслик ҳамда ўқув қўлланмалар ярата оладиган муаллифлар гуруҳини шакллантирди.
Лойиҳанинг биринчи босқичи 2015 йил майда бошланган эди. Унинг доирасида Тошкент ва Нукусда 20га яқин семинар-тренинглар ташкил этилди. Уларда лицей, коллеж ва ОТМнинг 134 инглиз тили педагоглари қатнашди.
Лойиҳанинг иккинчи босқичида иштирокчилар орасидан танлаб олинган 30 нафар муаллиф томонидан ўқув қўлланма яратиш бўйича фаолият олиб борилди. Натижада ўқув-услубий мажмуаларни яратишда ва дарс олиб бориш жараёнида илмий матнлар яратиш ва тадқиқотлар ўтказиш уқувларини ривожлантиришга урғу қилинган “В2 Ready” қўлланмаси яратилди ҳамда нашр этилди.
Лойиҳанинг якуний учинчи босқичида муаллифлар томонидан турли соҳалар учун ўзларининг ўқув қўлланмаларини яратиш ишлари бошланди.
