Ўзбекистонда интернет тезлиги 1,5 баробарга ошди
Тошкент. 4 июл. ЎзТАГ – I чорак якунлари бўйича Ўзбекистонда интернет тезлиги 1,5 баробарга ошди, деб хабар беради Ўзбек телеграф агентлиги (ЎзТАГ) Ўзбекистон Республикаси Ахборот технологиялари ва коммуникацияларини ривожлантириш вазирлигига таянган ҳолда.
Бу ҳақида Ахборот технологиялари ва коммуникацияларини ривожлантириш вазирлиги Ҳайъати кенгашининг йиғилишида эълон қилинди. Мажликда 2018 йилнинг I ярим йиллигида ахборот-коммуникацяи технологияларининг ривожланиш ҳолати, шунингдек соҳага хорижий сармояларнинг жалб этилиши ва инвестицион лойиҳаларнинг амалга оширилиши сарҳисоб қилинди.
“Халқаро интернет каналларига уланиш тезлиги секундига 140,034 Гбит.га етган, яъни, 2018 йилнинг бошига нисбатан 1,5 баробар ошган (йил бошида 94,034 Гбит/с). Шунинг билан бирга, операторлар ва провайдерлар учун халқаро интернет каналларига уланиш нархи ўзгаришсиз қолган – 1 Мбит/с учун 244958 сўмни ташкил қилмоқда”, - дейилади муассаса хабарида.
Аниқлаштирилишича, инвестиция лойиҳалари доирасида 690 км оптик толали алоқа тармоқлари ётқизилгани, мобил операторларнинг 1004 та база станциялари ўрнатилгани, уларнинг 483 таси 3G ва 4G LTE технологиясида хизмат кўрсатиши қайд этилди. Айни кунда юртимиз бўйлаб 24,5 минг км оптик толали алоқа тармоқлари ўтказилган, жами 20,994 та база станция ўрнатилган.
Эслатиб ўтамизки, йил бошида Ўзбекистон президенти Шавкат Мирзиёев вазирлик олдига мамлакатда интернет тезлигини 10 баробарга ошириш вазифасини қўйган эди. Чунки республика дунёнинг интернет тезлиги бўйича рейтингларида энг сўнгги ўринларни эгаллаб келади.
Сурат манбаи: http://techbahari.com/techtrends/
