Ўзбекистонда инвестициялар бўйича ягона портал яратилмоқда
Тошкент. 13 июл. ЎзТАГ – Яқин орада Ўзбекистонда инвестициялар бўйича ягона портал яратилади, деб хабар беради Ўзбек телеграф агентлиги (ЎзТАГ).
У республиканинг инвестицион салоҳияти, саноат ва ҳудудлар, мавжуд хом-ашё базаси, инвесторлар учун яратилган шарт-шароитлар, имтиёзлар ва бошқа енгилликлар ҳақида долзарб маълумотлар билан танишиш имконини беради. Шу билан бирга, порталда инвестициялар соҳасида турли маълумотлар базалари доимий янгиланади.
Бу ҳақида Ўзбекистон Республикаси Бош вазирининг ўринбосари – Инвестициялар бўйича давлат қўмитаси раиси С.Холмуродов 12 июлда Тошкентда бўлиб ўтган инвестиция таклифларини очиқ муҳокама қилишнинг биринчи ягона очиқ майдончасида айтиб ўтди.
Холмуродовнинг сўзларига кўра, портал барча манфаатдор томонлар ва уларни қизиқтирган саволлар бўйича инвесторлар ва лойиҳа ташаббускорларига, шу жумладан, уларни тегишли давлат хизматлари билан таъминлаш тартибига жавоб беради.
“Яқин келажакда Давлат инвестиция қўмитаси ҳузуридаги ягона инвестиция портали очилади, унда барча маълумотлар мавжуд бўлади ва чет элда бўлган инвестор ушбу маълумотлардан тўлиқ фойдаланиш, Давлат инвестиция қўмитаси мутахассислари билан бевосита алоқага чиқиш, савол бериш, жавоб олиш имкониятига эга бўлади. Ва буларнинг барчаси маълумотлар базасида сақланади ва доимий янгиланади. Биз доимий равишда қайси вазирлик, орган инвесторнинг сўровига ўз вақтида жавоб бермагани, ёрдам бермаганини кўриб ва тушуниб турамиз. Буларнинг барчаси мамлакатдаги инвестиция муҳити ва ишбилармонлик муҳитини сезиларли даражада яхшилаш, инвесторларнинг иқтисодиётнинг турли соҳаларига инвестиция киритишига бўлган ишончини оширишга қаратилган”, - деди Ўзбекистон Республикаси Инвестициялар давлат қўмитаси раиси.
Шунингдек, у жорий йилнинг биринчи ярмида Ўзбекистонда хорижий капитал билан 960 дан ортиқ корхона рўйхатдан ўтгани, бу эса ўтган йилнинг шу даврига қараганда деярли 3 баробар кўплигини қайд этди. Шу билан бирга, Россия Федерацияси, Туркия, Хитой, Қозоғистон ва Корея Республикаси вакиллари ўртасида алоҳида фаоллик кузатилмоқда. Шунингдек, Афғонистон, Ҳиндистон, Германия, Украина, Озарбайжон ва бошқа мамлакатлар ишбилармонлари ҳам биргаликдаги фаолиятга қизиқиш билдирмоқдалар.
Сурат манбаи: https://www.vseuz.com/suxrob-xolmurodov-vozglavil-goskominvesticij-uzreport-news.html
