Ўзбекистонда камёб ва ирсий-генетик касалликларга чалинган фуқаролар реестри яратилади
Тошкент. 9 сентябрь. ЎзТАГ – Ўзбекистонда камёб ва ирсий-генетик касалликларга чалинган фуқаролар реестри яратилади, деб хабар беради Ўзбек телеграф агентлиги (ЎзТАГ).
"Президентимизнинг 2019 йил 7 сентабрдаги"Камёб (орфан) ва бошқа ирсий-генетик касалликларга чалинган болаларга тиббий ва ижтимоий ёрдамни янада яхшилаш чора-тадбирлари тўғрисида"ги 4440-сонли қарори қабул қилинди. Ҳужжатга кўра, 2020 йил 1 январга қадар камёб (орфан) ва бошқа ирсий-генетик касалликларга чалинган беморларнинг миллий реестрини юритиш ташкил этилади", – дейилади Адлия вазирлиги матбуот хизмати хабарида.
Таъкидланганидек, қарорда камёб ва бошқа ирсий-генетик касалликларга чалинган болаларга тиббий ва ижтимоий ёрдам кўрсатишнинг асосий устувор йўналишлари белгилаб берилди.
Шунингдек, 2019-2024 йилларда камёб ва бошқа ирсий-генетик касалликларга чалинган болаларга тиббий ва ижтимоий ёрдам кўрсатишни ташкил этиш чора-тадбирлари дастури тасдиқланди.
Дастурга кўра, болаларда ушбу касалликларни ташхислаш ва даволаш учун жами 424,6 млрд. сўм ва 548,0 минг сўм ажратилиши кўзда тутилган.
Бундан ташқари, камёб касалликларни даволаш учун фойдаланиладиган тиббиёт буюмлари импорти Соғлиқни сақлаш вазирлиги томонидан тасдиқланган рўйхатга мувофиқ давлат рўйхатидан ўтказмасдан амалга оширилади.
Сурат манбаи: delfi.lv
