Ўзбекистонда касб ҳунар коллежлари битирувчилари 26 млн сўмдан 39 млн сўмгача микрокредит олишлари мумкин
Тошкент. 10 феврал. ЎзТАГ – Ўзбекистонда касб ҳунар коллежлари битирувчилари 26 млн сўмдан 39 млн сўмгача микрокредит олишлари мумкин, деб хабар беради Ўзбек телеграф агентлиги (ЎзТАГ).
Бу имконият Марказий банк томонидан Тижорат банклари томонидан касб-ҳунар коллежлари битирувчиларига микрокредитлар бериш тартиби тўғрисидаги низомни тасдиқлаганидан кейин пайдо бўлди.
Микрокредитлар тадбиркорлик фаолиятини амалга ошириш учун давлат рўйхатидан ўтган ёки юридик шахс устав фондида (устав капиталида) 50% ёки ундан ортиқ акцияга (улушга) эга бўлган касб-ҳунар коллежларида ўқишни якунлаган кунидан бошлаб 3 йилдан ортиқ вақт ўтмаган битирувчиларга миллий валютада берилади.
Юридик шахс ташкил этмаган ҳолда фаолият юритаётган қарз олувчиларга — энг кам ойлик иш ҳақининг 200 бараваригача ёки 26,048 млн сўм, юридик шахс ташкил этган ҳолда фаолият юритаётган қарз олувчиларга — энг кам ойлик иш ҳақининг 300 бараваригача ёки 39,072 млн сўм миқдорда қарз берилиши мумкин.
Шу билан бирга, микрокредит қарз олувчига кредит ажратилаётган лойиҳанинг ўзини-ўзи қоплаши ҳисобга олинган ҳолда, фаолиятни бошлаш учун айланма маблағларни шакллантиришга, инвестиция лойиҳасининг техник-иқтисодий асосини ишлаб чиқишга — 12 ой муддатгача, қишлоқ хўжалиги маҳсулотларини етиштириш ва қайта ишлашни ташкил этиш учун айланма маблағларини тўлдиришга, шунингдек асбоб-ускуналарни сотиб олишга — 2 йил муддатгача, инвестиция лойиҳаларини молиялаштириш учун — 3 йилдан ортиқ муддатга берилади.
Микрокредитдан фойдаланганлик учун фоиз ставкаси миқдори Марказий банкнинг қайта молиялаш ставкаси даражасидан юқори бўлмаган миқдорда, банкнинг имтиёзли кредитлаш жамғармаси ҳисобидан микрокредит ажратилган тақдирда Марказий банкнинг қайта молиялаш ставкасининг 50% миқдорида белгиланади. Микрокредитлар бўйича фоиз ставкаси миқдори Марказий банкнинг қайта молиялаш ставкаси ўзгаришига қараб ўзгариши мумкин. Марказий банкнинг қайта молиялаш ставкаси оширилган тақдирда шартномада кўрсатилган фоиз ставкаси ўзгаришсиз қолдирилади.
Бундан олдинроқ Ўзбекистон Марказий банки қайта молиялаштириш ставкасини йилига 9%да ўзгаришсиз қолдиргани ҳақида маълум қилинган эди.
Эслатиб ўтамизки, 2015 йил 1 сентябрдан Ўзбекистонда ЭКИҲМ 130,24 минг сўм.
$1 = 2841,6 сўм
