Ўзбекистонда корпоратив бошқарув соҳасида ҳал қилинмаган муаммолар кўп – Ислом Каримов
Тошкент. 19 январ. ЎзТАГ – Ўзбекистон президенти мамлакат ҳукуматининг 2014 йил якунлари ва 2015 йилги устиворликларга бағишланган йиғилишда қилган чиқишида мамлакатдаги амалда бўлган корпоратив бошқарув тизимини танқид қилди, дея хабар қилади Ўзбек телеграф агентлиги (ЎзТАГ).
“Корпоратив бошқарув тизимидаги принцип ва ёндашувларни тубдан ўзгартириш, ишлаб чиқариш, ташқи иқтисодий ва инвестиция жараёнларига замонавий халқаро корпоратив менежмент стандартларини жорий этиш жиддий эътиборни талаб қилади”, – деди Ислом Каримов.
Давлат бошлиғининг сўзларига кўра, бунинг учун энг аввало, корпоратив ёки акциядорлик бирлашмаларимизнинг фаолияти самарадорлигини танқидий баҳолаш, уларни хорижий давлатлардаги ана шундай корхоналар билан таққослаб кўриш зарур, чунки иқтисодий ривожланган мамлакатларда, айниқса, саноат соҳасида мулкчиликнинг бундай шакли етакчи ўрин тутади.
“Бугун шуни тан олиш зарурки, акциялаштириш жараёнини ривожлантириш кўламининг ўсиб бораётгани корпоратив бошқарув ва акциядорлик жамиятлари фаолиятидан тушадиган даромадларни тақсимлаш тизими ҳамда хусусийлаштириш жараёнининг бошқа бир қатор йўналишларида ҳал этилмаган кўплаб муаммолар мавжудлигини яққол кўрсатмоқда. Бу, айниқса, акциялар пакетларига давлат эгалик қилаётган акциядорлик жамиятларига тааллуқлидир. Бундай жамиятларда акциядорлар, айниқса, миноритарийлар кам ҳажмдаги акцияларга эгалиги ва акциялар пакетларининг тарқоқлиги туфайли бошқарув ва қарор қабул қилиш жараёнидан амалда четда қолмоқда”, – деб таъкидлади Ўзбекистон президенти.
