Ўзбекистонда корпоратив бошқарув тизими ўзгартирилади

Тошкент. 27 январ. ЎзТАГ – Ўзбекистонда Корпоратив бошқарув соҳасида принцип ва ёдашувларни тубдан ўзгартиш бўйича чоралар дастури ишлаб чиқилмоқда, дея хабар беради Ўзбек телеграф агентлиги (ЎзТАГ).

“Ушбу дастур доирасида давлат улуши бўлган акционерлик компанияларнинг янги намунавий таркибий тузилиши ва компания ходимларига янгича талаблар тасдиқланади. Бундан кўзланган асосий мақсад – шунчаки бошқарувчи ходимлар лавозимларининг номлари ва хизмат вазифаларини ўзгартириш эмас, балки уларнинг иш принципларини тубдан ўзгартириш, улар ишига янгича шакл ва мазмун беришдан иборат”, – деб таъкидлашди Иқтисодиёт вазирлигида.

Шунингдек, дастурни амалга ошириш орқали корхонани эскирган маъмурий-буйруқбозлик услубида бошқаришда давом этаётган самарасиз директорлик корпусидан бутунлай холос бўлиш ҳам режалаштирилмоқда. Уларнинг ўрнига бозор иқтисодиёти ва корпоратив бошқарувни чуқур билувчи янги менежерларни олиб келиш ҳам кўзда тутилмоқда.