Ўзбекистонда лизинг операцияларининг ялпи портфели 7,1% кўпайди
Тошкент. 25 июл. ЎзТАГ – 2016 йилнинг биринчи ярми якунлари бўйича Ўзбекистонда лизинг операцияларининг ялпи портфели 2,63 трлн сўмдан ошиб, ўтган йилга нисбатан 7,1% кўпайди, деб хабар беради Ўзбек телеграф агентлиги (ЎзТАГ).
“2016 йилнинг биринчи ярмида мамлакат лизинг берувчилари томонидан 2 мингдан зиёд лизинг битимлари тузилди, уларнинг ҳажми 430 млрд сўмдан ошди.
Лизингга берилаётган объектлар орасида технологик ускуналар етакчилик қилади. Уларнинг битимлар ялпи ҳажмидаги улуши 38% ташкил қилди. Шунингдек, қишлоқ хўжалик техникаси улуши 27%, автотранспорт улуши 18% ва кўчмас мулк улуши 17% ташкил қилди”, - деб таъкидлашди Лизингберувчилар уюшмасида.
“Ўзқишлоқмашлизинг” 114,8 млрд сўмлик, “Uzbek Leasing International” 28,5 млрд сўмлик, “Ўзавтосаноатлизинг” 25,2 млрд сўмлик, “Ўзмелиомашлизинг” 23,7 млрд сўмлик ва Taiba Leasing 16,2 млрд сўмлик битимлар билан бозорнинг йирик иштирокчиларидан бўлдилар.
Ярим йиллик якунлари бўйича лизинг операциялар сони бўйича энг фаол банклар сирасига “Капиталбанк” 37,3 млрд сўмлик, “Асака” АТБ 20,6 млрд сўмлик, “Қишлоқ Қурилиш Банк” 18,9 млрд сўмлик, Asia Alliance Bank 15,7 млрд сўмлик ва Халқ банки 14,9 млрд сўмлик битимлар билан кирдилар.
Янги лизинг битимлари ҳажми бўйича вилоятлар орасида энг катта улуш Тошкент шаҳрига тегишли – 38,4%, иккинчи ва учинчи ўринларда Жиззах ва Тошкент вилоятлари бормоқда. Уларга навбати билан 8% ва 6,8% улуш тегишли.
