Ўзбекистонда LTE TDD технологияси бўйича МДҲда биринчи кенг полосали интернетга чиқиш тармоғи ишга туширилди
Тошкент. 1 апрел. ЎзТАГ – 1 апрелдан бошлаб Ўзбекистонда Super iMAX МЧЖ (100% Korea Telecomга қарашли) 4G LTE TDD (time division duplex) технологияси бўйича МДҲда биринчи кенг полосали интернетга чиқиш тармоғини ишга туширди, дея хабар беради Ўзбек телеграф агентлиги (ЎзТАГ) Super iMAX матбуот хизматига асосланган ҳолда.
“LTE TDD тармоғи МДҲдаги ана шундай биринчи тармоқдир. 2015 йилда ушбу технологиядан Тошкент, Самарқанд, Бухоро ва Ўзбекистоннинг йирик шаҳарлари абонентлари фойдаланиш имкониятига эга бўладилар”, - деб аниқлаштирди провайдер вакили. Унинг сўзларига кўра, 2016 йилда тармоқ бошқа ҳудудларни ҳам қамраб олади ва мавжуд WiMAX технологияси ўрнини эгаллайди. Лойиҳага киритилган инвестициялар миқдори $10 млнга тенг.
Маълумот ўрнида, Super iMAX МЧЖ 2007 йил октябрда Korea Telecom (60% акция) ва япониянинг Sumitomo Corp. (40%) томонидан таъсис қилинган. Кейинчалик Sumitomo Corp. таъсисчилар таркбидан чиқди ва бугунда Korea Telecom Super iMAXнинг 100% акцияларига эгалик қилади.
Super iMAX маҳаллий ва халқаро телекоммуникация тармоқларини қуриш, эксплуатация қилиш ва маълумотлар узатиш лицензияларига эга. Оператор EVO савдо белгиси остида WiMAX технологияси орқали интернетга уланиш хизматларини кўрсатади.
Ўзбек томони маълумотларига кўра, 2014 йилда Ўзбекистонда интернет тармоғига уланиш тезлиги 2013 йилдагига қараганда 1,6 бараварга ўсиб, секундига 16,6 гигабитни ташкил этди.
