Ўзбекистонда маиший техникани олиб киришга чекловлар жорий этилади

Тошкент. 25 июн. ЎзТАГ – 1 июлдан Ўзбекистонда хориждан маиший ва электрон техникани олиб киришга чекловлар жорий этилади, деб хабар беради Ўзбек телеграф агентлиги (ЎзТАГ).

Бу Ўзбекистон Вазирлар Маҳкамасининг 22 июндаги “Жисмоний шахслар томонидан Ўзбекистон Республикасига товарларни олиб ўтиш тартибини такомиллаштиришга доир қўшимча чора-тадбирлар тўғрисида”ги қарори билан кўзда тутилган.

Ҳужжатга мувофиқ, бир ой давомида фуқаролар Ўзбекистонга шахсий фойдаланиш мақсадларида бир донадан техника олиб келишлари мумкин. Бундай товарлар рўйхатига совутгич, музлатгич, кондиционер, кир ювиш машинаси, чанг ютгич, газ плитаси, электр плита, телевизор, микротўлқинли печь, духовкали печь, телефон аппарати (шу жумладан, қўл телефони), компьютер техникаси (ноутбук, принтер, планшетлар) киритилган.

Шунингдек, товарларни божхона тўловлари ундирмасдан олиб ўтишнинг чеклаган меъёрлари ҳам амал қилмоқда. Хусусан, божхона чегарасини халқаро аэропортлар орқали кесиб ўтганда уларнинг умумий қиймати $2 мингдан, темир йўл ва дарё пунктлари орқали кесиб ўтганда $1 мингдан ошмаслиги зарур.

$1=7871,66 сўм

Сурат манбаи: http://toprabot.com/ru/pobutteh/