Ўзбекистонда Маркетинг ва реклама ҳафталиги бошланди

Тошкент. 20 апрел. ЎзТАГ – Бугун Ўзбекистон пойтахтида АDWEEK.UZ -Маркетинг ва реклама ҳафталиги бошланди, деб хабар беради Ўзбек телеграф агентлиги (ЎзТАГ).

Ҳафталикнинг мақсад ва дастури ҳақида 19 апрелда бўлиб ўтган матбуот анжуманида маълум қилинди.

Ҳафталикнинг илк тадбири эса 20 апрелда очилган USENET интернет-конференцияси бўлади. 22 апрелда эса Сергея Спивакнинг медиарежалаштириш, рекламани баҳолаш ва контекст рекламага бағишланган семинари ўтказилади.

25-26 апрелда ҳафталик ADFORUM 2016 форум-кўргазмаси билан давом этади. 27 апрелда россиялик таниқли маркетолог Игорь Маннинг бозорда қандай қилиб етакчи мавқега эришиш ва бюджетсиз сифатли реклама кампаниясини қандай уюштиришга бағишланган иккита семинари ўтказилади.

Матбуот анжуманида Давлат рақобат қўмитасининг Реклама фаолияти устидан назорат ва истеъмолчилар ҳуқуқларини муҳофаза қилиш бошқармаси бошлиғи Дилшод Азимовнинг таъкидлашига кўра, ADWEEK.UZ  тадбири реклама бозори субъектлари, ишлаб чиқарувчилар ва истеъмолчиларни бир жойга тўплайди.