Ўзбекистонда миллий автомагистраль қурилиши графикдан орқада қолаётганлиги маълум бўлди

Тошкент. 17 апрель. ЎзТАГ – Бухоро ва Сурхандарё вилоятлари ҳудудларида миллий автомагистраль қурилиши режадагидан ортда қолаётганлиги аниқланди, дея хабар беради Ўзбек телеграф агентлиги (ЎзТАГ).
Бухоро, Қашқадарё ва Сурхандарё вилоятларидан ўтувчи йўл бўлимида жами 40 сервис, савдо нуқталари, меҳмонхоналар, тиббий ёрдам пункти, АЁҚШ ва автомобилларга техник хизмат кўрсатиш станциялари қуриш режалаштирилган. Айни пайтда 36 объектдан атига 7 таси топширилган.
Бунга тадбиркорлик субъектларини нотўғри танлаш, ишни самарасиз ташкил қилиш, тадбиркорларга кредитлар ажратиш масаласининг вақтида ҳал этилмаганлиги, буюртмачилар томонидан хужжатларни расмийлаштиришдаги ушланиб қолишлар сабаб бўлган.
Эслатиб ўтамизки, қиймати $2,6 млрд атрофида бўлган Ўзбек миллий автомагистрали қурилиши 2009 бошланган бўлиб, 2015 йилга келиб унинг умумий узунлиги 1501 км. бўлган тўрт бўлимини қуриб битказиш режалаштирилган.
Ушбу йўл мамлакатнинг шимолий-ғарбий чегарасидан жанубий-шарқий чегарасигача ўтиб, Ўзбекистонннинг энг йирик шаҳарларини боғлайди.
Унинг қурилиши тугаллангандан кейин халқаро ва транзит юк ташиш ҳажми ўртача 50%, ички юк ва пассажирлар ташиш ҳажми эса 60-70% ўсиши керак.