Ўзбекистонда миллий терманинг янги мураббийси белгиланди

Тошкент. 18 октябр. ЎзТАГ – Ўзбекистон Футбол федерацияси Қаршининг “Насаф” жамоаси мураббийси Рўзиқул Бердиев миллий терманинг бош тренери вазифасини бажарувчи этиб тайинланиши ҳақидаги миш-мишларни тасдиқлади, деб хабар беради Ўзбек телеграф агентлиги (ЎзТАГ).

“Айни пайтда Ўзбекистон Футбол федерациясининг президенти Умид Аҳмаджонов расмий сафар билан Қатарда бўлиб турибди. Рўзиқул Бердиевнинг миллий терманинг бош тренери вазифасига тайинланиши масаласига федерация президентининг сафаридан кейин ўтказиладиган ЎФФ раҳбариятнинг навбатдаги мажлисида аниқлик киритилади. Йиғилиш ЎФФ раҳбари Қатардан қайтгач бўлиб ўтади” – деб таъкидлашди Футбол федерациясида.

Эслатиб ўтамизки, терманинг олдинги бош мураббийси Самвел Бабаян 2018 йилги жаҳон чемпионатининг саралашидаги муваффақиятсизликдан кейин ишдан бўшатилган эди. У бошқарган терма ўз гуруҳида тўртинчи ўринни эгаллаб, турнир финалига чиқа олмади.