Ўзбекистонда муқаддас Рамазон ойи 18 июндан бошланади
Тошкент. 17 июн. ЎзТАГ – 18 июндан бошлаб Ўзбекистонда муқаддас Рамазон (рўза) ойи бошланади, деб хабар беради Ўзбек телеграф агентлиги (ЎзТАГ) Ўзбекистон президенти Ислом Каримовнинг Муборак Рамазон ойини муносиб тарзда ўтказиш тўғрисидаги қарорига асосланган ҳолда.
Қарорда Рамазон ойининг мамлакат маънавий ҳаёти, жамиятда меҳр-оқибат, ўзаро аҳиллик ва тотувлик муҳитини янада мустаҳкамлаш, ўзбек халқининг ўзига хос олижаноб фазилатларни, диний-маърифий қадриятларимизни асраб-авайлаш ва улуғлашдаги алоҳида ўрни таъкидланади.
Муқаддас ойда эҳтиёжманд кишиларни ҳар томонлама қўллаб-қувватлаш, оила ва маҳаллаларда меҳр-оқибат муҳитини мустаҳкамлаш, ёши улуғ инсонларга эътибор ва ғамхўрлик кўрсатиш, буюк алломалар, азиз-авлиёларимизнинг табаррук қадамжолари ва зиёратгоҳларини ободонлаштиришга алоҳида эътибор берилиши кўзда тутилмоқда.
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари “Нуроний” жамғармаси, “Маҳалла” хайрия жамоат фонди ва бошқа жамоат ташкилотлари билан ҳамкорликда Рамазон ойини жойларда миллий анъана ва қадриятлар ва урф-одатларга мос тарзда ўтказиш топширилди.
Эслатиб ўтамизки, Рамазон (рўза) – мусулмон тақвимидаги ой номидир. Бу ойда барча мусулмонлар куннинг ёруғ вақтида ейиш, ичиш ва бошқа тан лаззатларидан вос кечган ҳолда рўза тутишлари зарур.
