Ўзбекистонда “Наманган” эркин иқтисодий зонасининг қурилиши бошланди

Тошкент. 28 феврал. ЎзТАГ – Ўзбекистонда “Наманган” эркин иқтисодий зонасининг қурилиши бошланди, бунинг учун Наманган шаҳри Исломобод мавзесида 80 гектар жой ажратилган, деб хабар беради Ўзбек телеграф агентлиги (ЎзТАГ).

Давлат рақобат қўмитаси матбуот хизматининг хабар беришича, бу ерда $61,6 млнлик 42 та лойиҳани амалга ошириш режалаштирилган бўлиб, бу иш 5,5 мингдан ортиқ янги иш ўринларини яратишга имкон беради.

Улардан бири – “Оcеан Товелс Текстил” МЧЖ томонидан амалга оширилаётган қиймати $11 млнлик лойиҳадир. Унинг доирасида сочиқ, чойшаб ва бошқа маҳсулотлар ишлаб чиқариш йўлга қўйилади.

Шунингдек, “Наманган” ЭИЗда саноат, озиқ-овқат ва бошқа маҳсулотлар ишлаб чиқариш, электротехника маҳсулотлари ва қурилиш материаллари ишлаб чиқариш ташкил этилади. Шу мақсадда энергетика ва газ таъминоти, сув таъминоти ва канализация, алоқа тизими каби муҳандислик-коммуникация инфратузилмаси шакллантирилмоқда.

Эслатиб ўтамизки, ушбу ишлар Президентнинг 2016 йил 26 октябрдаги “Эркин иқтисодий зоналарнинг фаолиятини фаоллаштириш ва кенгайтириш бўйича қўшимча чора-тадбирлар тўғрисида”ги фармонини амалга ошириш доирасида амалга оширилмоқда.

Сурат манбаи: https://www.gazeta.uz/oz/2017/08/31/angren/