Ўзбекистонда ногиронларни ишга жойлашга ёндашувлар такомиллаштирилмоқда

Тошкент. 27 июн. ЎзТАГ – Ўзбекистонда “Ногиронларни реабилитация қилишнинг индивидуал дастури” шакли, уни тўлдириш ва бажариш услуби ишлаб чиқилади, деб хабар беради Ўзбек телеграф агентлиги (ЎзТАГ).

Ушбу масала ногиронларни оқилона ишга жойлаштириш ва касбий реабилитация қилиш мавзусига бағишлаб ўтказилган семинарда маҳокама қилинди. У Республика Тиббий-ижтимоий экспертиза инспекцияси томонидан БМТнинг тараққиёт дастури кўмагида ташкил этилди.

Семинарнинг асосий мақсади – ногиронларнинг касбий–меҳнат реабилитацияси, шу билан бирга ногиронларни оқилона ишга жойлаштириш учун меҳнат тавсиялари бериш мобайнида юзага келаётган муаммоларнинг ечимини топишнинг аниқ йўлларини белгилаб олишдан иборат бўлди.

Семинар мобайнида, замонавий технологияларнинг кун сайин ривожланиб бораётгани, ишлаб чиқариш такомиллашиб, замонавий меҳнат бозори ва хусусий тадбиркорлик ривожланиб бораётган бир пайтда, ТМEК врач–экспертлари томонидан ногиронларнинг меҳнат фаолияти билан шуғулланиш лаёқатини чекланиш даражасини аниқлаш ҳамда уларга меҳнат тавсиялар бериш жараёнида маълум бир қийинчиликка дуч келаётгани алоҳида қайд этиб ўтилди.

Шу сабабли бугунги кунда, ногироннинг меҳнат қилиш лаёқатини аниқлаш (ёки меҳнат фаолияти билан шуғулланиш лаёқатини чекланиш даражасини аниқлаш) мезонларини ишлаб чиқиш биринчи галдаги вазифа ҳисобланади. Шунингдек, ногиронларни аниқ йўналтирилган ҳолда оқилона ишга жойлаштириш масаласи кенг кўламда кўриб чиқилди.