Ўзбекистонда ОАВга таалуқли икки қонун лойиҳаси муҳокама қилинди
Тошкент. 27 октябр. ЎзТАГ – Ўзбекистонда “Оммавий ахборот воситалари фаолиятининг иқтисодий асослари тўғрисида” ва “ОАВни давлат томонидан қўллаб-қувватлашнинг ҳуқуқий асослари тўғрисида”ги қонун лойиҳалари муҳокама қилинди, дея хабар беради Ўзбек телеграф агентлиги (ЎзТАГ).
Қонунчилик палатасидан хабар қилишларича, муҳокама Ўзбекистон журналистлари уюшмаси томонидан парламент Ахборот ва коммуникация технологиялари қўмитаси билан биргаликда ташкил этилди.
“Янги қонунларнинг қабул қилиниши ОАВ соҳасида бозор иқтисодиёти механизмларини жорий этиш, уларнинг иқтисодий эркинлигини таъминлаш учун ҳуқуқий асос бўлиб хизмат қилади”, - деб қайд этилди қонун муҳокамасида.
Эслатиб ўтамизки, Ўзбекистонда ОАВ соҳасида 10 ортиқ қонунчилик хужжатларини ўз ичига олган салмоқли ҳуқуқий база яратилган. Бу соҳада кейинги қонунлардан бири жорий йил 5 майда қабул қилинган “Давлат бошқаруви органларининг очиқлиги тўғрисида”ги қонундир.
