Ўзбекистонда қонунчилик хужжатларини тарқатиш тизими ўзгартирилади

Тошкент. 9 феврал. ЎзТАГ – Ўзбекистонда қонунчилик хужжатларини тарқатиш тизими ўзгартирилади, деб хабар беради Ўзбек телеграф агентлиги (ЎзТАГ).  

Бу Ўзбекистон Президенти Шавкат Мирзиёевнинг “Қонун ҳужжатларини тарқатиш тизимини тубдан такомиллаштириш чора-тадбирлари тўғрисида”ги қарори билан кўзда тутилган.

Ушбу хужжат қонунчиликнинг моҳияти ва аҳамиятини ижрочилар ва аҳолига тушунтиришнинг сифатини ошириш, ушбу соҳадаги ишни ташкил қилишга бутунлай янги ёндашувлар ишлаб чиқишга йўналтирилган.

Бундан буён барча норматив-ҳуқуқий ҳужжатлар имзоланган куни ахборот-таҳлилий материаллари билан бирга қоғоз ва электрон шаклда Адлия вазирлигига юборилади, Адлия вазирлиги эса бир кунлик муддатда норматив-ҳуқуқий ҳужжатларни ва тегишли ахборот-таҳлилий материалларни электрон шаклда Вазирлар Маҳкамаси томонидан белгилаб бериладиган рўйхат бўйича барча давлат органлари ва ташкилотларига етказилишини таъминлайди.

Шу билан биргаликда, Адлия вазирлиги янги қабул қилинган ҳужжатларни Lex.uz сайтига бир кунлик муддатда жойлаштиради ва ҳар ҳафта Ўзбекистон Қонун ҳужжатлари тўпламида эълон қилиб боради.

Бундан ташқари, қарор “Ҳуқуқий ахборотни тарқатиш ва ундан фойдаланишни таъминлаш тўғрисида”ги қонун лойиҳасини ишлаб чиқишни ҳам назарда тутади.