Ўзбекистонда органик қишлоқ хўжалигининг ривожланиши муҳокама қилинди
Тошкент. 25 август. ЎзТАГ – 22-24 августда Тошкент ва Самарқандда “Марказий Осиёда органик қишлоқ хўжалигининг ривожланиши” халқаро конференцияси бўлиб ўтди, деб хабар беради Ўзбек телеграф агентлиги (ЎзТАГ).
Тадбир Ўзбекистон Республикаси Қишлоқ ва сув хўжалиги вазирлиги ва Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) томонидан ташкил этилди.
БМТнинг ваколатхонаси маълумотига кўра, унда Шарқий Европа ва Осиёдан органик қишлоқ хўжалиги билан шуғулланувчи етакчи олимлар, экспертлар, соҳа мутахассислари иштирок этдилар.
Форумда органик қишлоқ хўжалигини ривожлантириш бўйича МДҲ ва Европа давлатларининг тажрибалари намойиш этилди. Органик қишлоқ хўжалигини ривожлантириш ва унинг жараёнларини умумлаштириш бўйича ўзаро тажриба алмашинилди, органик ишлаб чиқариш учун институционал ва илмий асосларни яратиш ҳамда органик қонунчиликни яратиш ва мустаҳкамлаш бўйича муаммолар муҳокама қилинди.
Анжуман иштирокчилари 24 август куни Самарқанд вилояти Тойлоқ туманидаги “Сиёб Шавкат Орзуси” фермер хўжалиги ҳамда қишлоқ хўжалиги маҳсулотларини қайта ишлаш корхоналарида бўлиб, ҳудуднинг анъанавий ва органик қишлоқ хўжалиги маҳсулотларини етиштириш борасида амалга оширилаётган ишлар, илғор тажрибалар ва экспорт имкониятлари билан танишдилар.
Шунингдек, улар Самарқанд вилоятидаги қишлоқ хўжалиги маҳсулотларини қайта ишловчи заводлардан бирига ташриф буюрдилар, қишлоқ хўжалиги ярмаркасида қатнашдилар, экспортнинг имкониятлари ва мева-сабзавот маҳсулотларини қайта ишлаш илғор тажрибаси билан танишдилар.
