Ўзбекистонда пазандалик бўйича биринчи чемпионат ўтказилади
Тошкент. 25 январ. ЎзТАГ - Ўзбекистон Ошпазлар уюшмаси пазандалик бўйича I “OLTIN PICHOQ” мамлакат чемпионатида иштирок этиш учун аризалар қабул қилишни бошлади, деб хабар беради Ўзбек телеграф агентлиги (ЎзТАГ).
Чемпионат Халқаро пазандалик санъати маркази билан ҳамкорликда ташкил этилган бўлиб, соҳада ишлаётган барча профессионал бош ошпазлар, шунингек, меҳмонхона ва ресторан бизнеси ва кейтринг соҳалари вакиллари, пазандалик касб-ҳунар коллежлари талабаларига мўлжалланган. Аризалар рус ёки ўзбек тилларида қабул қилинади, унга таомнинг тайёрланиш баёни илова қилинган бўлиши зарур”, - деб таъкидлашди Ўзбекистон Ошпазлар уюшмаси матбуот хизматида.
Бошланғич маълумотларга кўра, чемпионат финали 2016 йил мартда бўлиб ўтади, чемпионатда қатнашиши учун аризалар эса жорий йилнинг 29 февралига қадар қабул қилинади.
