Ўзбекистонда пневмококк инфекциясига қарши эмлаш бошланди

Тошкент. 3 ноябр. ЎзТАГ – 2 ноябрдан бошлаб Ўзбекистонда 2, 3 ва 12 ойлик болаларни пневмококк инфекциясига қарши "Превенар-13” вакцинаси билан эмлаш бошланди, деб хабар беради Ўзбек телеграф агентлиги (ЎзТАГ).

Соғлиқни-сақлаш вазирлигидан маълум қилишларича, БССТ маълумотига кўра, бутун дунёда ҳар йили пневмониядан 1,6 млн киши, жумладан, 800 минг бола вафот этади.

Ўзбекистон олимлари тадқиқотларига кўра, болалар орасида пневмококклар билан оғриш 57,2% атрофидани ташкил қилади.

Пневмококкли касалликларни даволаш учун қимматбаҳо антибиотиклар зарур бўлиши мумкин, аммо кейинги пайтда пневмокок штаммлари уларга чидамли бўлиб бормоқда. Ушбу муаммонинг энг самарали ечими касалликка қарши эмлашдир.

Пневмококк вакцинаси 45 мамлакат, жумладан, Германия, Австрия, Туркия, Италия, Бельгия, Россия ва бошқа мамлакатларнинг эмлаш тақвимига киритилган.

Маълумотларга кўра, пневмококк вакцинасининг жорий этилиши пневмококк инфекциялари билан оғришни 5 йилгача 50% ва ундан кўпга камайтиради.

Эслатиб ўтамизки, пневмококк инфекцияси – ўта ҳавфли хасталиклардан бири бўлиб, у пневмония (ўпканинг яллиғланиши), ярали менингит, бронхит, отит, синусит, сепсис, эндокардит, артрит ва бошқа пневмококклар инфекциялари натижасида юзага келади. Касаллик болалар, айниқса, кичик болалар учун ҳавфли.