Ўзбекистонда ҚҚС ставкаси 15% гача камайиши мумкин

Тошкент. 13 сентябрь. ЎзТАГ – Ўзбекистонда қўшилган қиймат солиғи (ҚҚС) ставкаси 15% гача камайиши мумкин, дея хабар беради Ўзбек телеграф агентлиги (ЎзТАГ).

11 сентябрь куни Ўзбекистон президенти Шавкат Мирзиёев раислигида кичик бизнес ва хусусий тадбиркорликни янада ривожлантириш, уларнинг фаолияти самарадорлигини ошириш, шунингдек, давлат бюджетига тушумларни кафолатли таъминлаш масалаларига бағишланган видеоселектор йиғилиши бўлиб ўтди.

"Тадбиркорлик субъектларини янада қўллаб-қувватлаш мақсадида Молия вазирлигига амалдаги ҚҚС ставкасини 20 дан 15% гача пасайтириш бўйича президент қарори лойиҳасини киритиш топширилди", - дейилади Молия вазирлиги матбуот хизмати хабарида.

Қайд этилганидек, ҚҚС ставкасининг пасайиши, солиқ кодексининг янги таҳририда (Молия вазирлиги томонидан муҳокама учун эълон қилинган) тақдим этиладиган бетарафликни таъминлашга қаратилган чора-тадбирлар билан биргаликда хўжалик юритувчи субъектлар фаолиятига ижобий таъсир кўрсатади.

Солиқ кодексининг янги таҳрирдаги лойиҳасида сотиб олинадиган асосий воситалар ва кўчмас мулк бўйича ҚҚС суммасини (12-36 ой давомида бир хил тартибда ҳисоб-китобга киритишнинг амалдаги тартиби ўрнига) бир марталик ҳисобга олиш тартибини жорий этиш, шунингдек, ҳисобланган солиқ миқдори бўйича ҳисобланган ҚҚС суммасининг юқорилиги бўйича ҚҚС суммасини қоплаш ҳуқуқи солиқ тўловчиларнинг бутун доирасига (илгари – фақат экспортчиларга) берилади.

Дастлабки ҳисоб-китобларга кўра, 5 фоиз пунктга ҚҚС ставкасининг пасайиши давлат бюджетига йилига 10 триллион сўм ёки ялпи ички маҳсулотга нисбатан 2% миқдорида тушумларни камайтиради.

Сурат манбаи: life.ru