Ўзбекистонда тўртинчи GSM-оператор иш бошлади
Тошкент. 15 апрел. ЎзТАГ – Бугун Ўзбекистоннинг миллий алоқа оператори бўлган “Ўзбектелеком” акционерлик компанияси (АК) сиғими 2 млн абонент бўлган GSM стандартидаги тармоғини ишга туширди, дея хабар беради Ўзбек телеграф агентлиги (ЎзТАГ) компания вакилига асосланган ҳолда.
“Компания GSM тармоғини 15 апрелдан бошлаб тижорат мақсадларида эксплуатацияга туширди. Пойтахт ва Тошкент вилоятининг барча офисларида янги абонентларни улаш бошланди”, - деб аниқлаштирди агентлик суҳбатдоши.
Оператор 2016-2017 йилларда тармоқни бутун Ўзбекистон бўйлаб кенгайтириш ниятида.
Бундан олдин 2018 йилга бориб “Ўзбектелеком” “Ўзмобайл” филиали асосида республика бўйлаб GSM-тармоғини ишга тушириши ҳақида хабар қилинган эди. Режага кўра, оператор 3,9 минг базавий станциялар ва 4 минг комплект радиореле ускуналари ўрнатишни режалаштирган. Тармоқ 8 млн рақамга мўлжалланган. Лойиҳанинг умумий қиймати $550 млн. Шунингдек, компания 2004 йилда ташкил этилган CDMA-450 тармоғини ишлатишни ҳам давом эттиради.
Тахминий баҳоларга кўра, 2014 йил охирида аҳолиси 31 млн бўлган Ўзбекистонда 20 млн атрофида мобиль алоқа абоненти бўлган.
Ҳозирда ўзбек мобиль алоқа бозорида Unitel ХК МЧЖ (Vimpelcom Ltd холдингига қарашди) ва Coscom ХК МЧЖ (TeliaSoneraга қараши) GSM-операторлари етакчилик қилмоқда. 2014 йил 1 декабрдан республикада россиянинг МТС ширкати иштирокида ташкил этилган Universal Mobile Systems (UMS) МЧЖ ҳам фаолият бошлади. Бозорда CDMA-операторлар – Rubicon Wireless Communication (RWC, Perfectum Mobile савдо белгиси) ва “Ўзмобайл” (“Ўзбектелеком” филиали) ҳам ишламоқда.
