Ўзбекистонда товарларни етказиб беришни кечиктирган импорт қилувчиларга жарима солинади

Тошкент. 21 декабр. ЎзТАГ – Маҳсулотларни Ўзбекистонга ўз вақтида етказиб беришни кечиктирган импорт қилувчилар учун жарималар кўзда тутилмоқда, деб хабар беради Ўзбек телеграф агентлиги (ЎзТАГ).

Янги меъёр Вазирлар Маҳкамасининг 14 декабрдаги 984-сон қарорида кўзда тутилган бўлиб, унинг билан ҳукуматнинг айрим қарорларига ўзгартиришлар ва қўшимчалар киритилди.

Жарималар “30 банк кунидан ортиқ муддатга (кичик бизнес ва хусусий тадбиркорлик учун – 60 банк куни) республикага товарларни олиб киришни таъминламаган ва уларни “эркин муомалага чиқариш” режимига (ишларни бажаришни ёки хизматлар кўрсатишни) расмийлаштирмаган импорт қилувчилар учун” жорий этилмоқда.

Эслатиб ўтамизки, Божхона кодексига биноан эркин муомалага чиқариш (импорт) шундай режимки, бунда божхона ҳудудига олиб кирилган товар уни ушбу ҳудуддан қайтариб олиб чиқиш мажбуриятисиз шу ерда эркин муомалада қолади.

3 ойга (180 кунга) кечиктирилганда жарима миқдори “эркин муомалага чиқариш” режимига расмийлаштирилмаган товарлар (бажарилмаган ишлар, кўрсатилмаган хизматлар) суммасига нисбатан 10%, 180 кундан 365 кунгача 20%, бир йилдан ошиқ муддатда 70% ташкил қилади.

Эслатиб ўтамизки, ҳудди шундай жарима санкциялари хориждан хорижий валютада тушум тушишининг кечикишига йўл қўйган экспорт қилувчилар  учун белгиланган эди.

Сурат манбаи: https://radiotochka.kz/30752-prinuditelnaya-oplata-shtrafa-pri-videofiksacii.html