Ўзбекистонда туристларни вақтинчалик рўйхатдан ўтказиш учун жавобгарлик қабул қилувчи томонга юклатилди
Тошкент. 1 июн. ЎзТАГ – Ўзбекистонда туристларни вақтинчалик рўйхатдан ўтказиш учун жавобгарлик қабул қилувчи томонга юклатилди, деб хабар беради Ўзбек телеграф агентлиги (ЎзТАГ) Туризмни ривожлантириш давлат қўмитаси матбуот хизматига таянган ҳолда.
Бунинг учун Ўзбекистон Вазирлар Маҳкамасининг 2018 йил 29 майдаги “Ўзбекистон Республикаси Ҳукуматининг айрим қарорларига ўзгартиришлар ва қўшимчалар киритиш, шунингдек, айрим қарорларни ўз кучини йўқотган деб тан олиш тўғрисида”ги қарори қабул қилинди. Унинг билан мамлакатда чет эл фуқароларининг бўлиш қоидаларни бузганлик учун чораларни енгиллаштирувчи ўзгартишлар киритилмоқда.
Эндиликда хориж фуқаролари ва фуқаролиги бўлмаган шахслар, шунингдек МДҲга аъзо давлатлар фуқароларининг, мустақил саёҳат қилаётган чет элликлардан ташқари, вақтинчалик прописка учун жавобгарлиги қабул қилувчи шахслар зиммасига юклатилади.
Авваллари вақтинчалик прописка учун жавобгарлик чет эл фуқароларининг зиммасига юклатилган бўлиб, улар қонунчиликни бузишса, Ўзбекистон Республикасида энг кам иш ҳақининг 50 дан 100 баробаригача миқдорда жаримага тортилар эди.
“Шу билан бирга, мустақил саёҳат қилаётган хориж фуқаролари (чодирлар лагери ёки ер усти транспортида яшовчи мустақил саёҳат қилувчилар) рўйхатдан ўтмаган ёки сайёҳлик йиғимини тўламаган ҳолда тўланмаган миқдорнинг ўн баробари ҳажмида жарима тўлайдилар (43 060 сўм). Рўйхатдан ўтмаган ёки сайёҳлик йиғимини тўламаган ҳолда яшашда жарима миқдори 430 600 сўмга ёки 54 АҚШ долларига тенг бўлади”, - дейилади қўмита хабарида.
Эслатиб ўтамизки, бундан илгари барча хорижий сайёҳлар бир кун ичида ички ишлар органларида рўйхатдан ўтиши зарур эди.
1 ЭКИҲМ – 172240 сўм
$1 = 7982,25 сўм.
Сурат манбаи: http://zakon-auto.ru/reg/vremennaya.php
