Ўзбекистонда украин товарларидан олинадиган қўшимча импорт йиғими бекор қилинди
Тошкент. 23 феврал. ЎзТАГ – Ўзбекистонда украин товарларидан олинадиган қўшимча импорт йиғими бекор қилинди, деб хабар беради Ўзбек телеграф агентлиги (ЎзТАГ).
Ўзбекистон Ташқи иқтисодий алоқалар, инвестициялар ва савдо вазирлиги хабарида айтилишича, “Ўзбекистон Республикаси Вазирлар Маҳкамасининг 2016 йил 18 февралдаги 45-қарори билан Украинада ишлаб чиқарилган товарларга нисбатан олдин жорий этилган қўшимча импорт йиғими бекор қилинди”.
“Ушбу қарор Украинанинг 2015 йил 24 декабрдаги “2016 йил 1 январдан Украина ҳудудига олиб кирилаётган товарларга нисбатан қўшимча импорт йиғимини бекор қилишни кўзда тутувчи ташқи иқтисодий фаолиятни рағбатлантиришга доир чоралар тўғрисида”ги 912-VIII- қарорнинг қабул қилиниши билан белгиланади”, - дейилади хабарда.
Вазирлик хабарига кўра, 2015 йил 26 февралда Украина барча хориждан олиб келинаётган товарлар, жумладан, Ўзбекистондан келтирилаётган товарлар импортига 5-10% миқдорда қўшимча йиғим жорий этган эди.
Бунга жавобан Ўзбекистон ҳам мамлакатнинг иқтисодий манфаатларини ҳимоя қилиш мақсадларида 2015 йил 1 июлдан 12 ойга Украинада ишлаб чиқарилган товарлар импортига нисбатан қўшимча импорт йиғими жорий қилган эди.
