Ўзбекистонда валюта тушумининг 25% мажбурий сотиш тартиби бекор қилинди
Тошкент. 31 июл. ЎзТАГ – 2017 йилнинг 1 августидан бошлаб Ўзбекистонда экспорт қилувчи хўжалик субъектларига маҳсулотлар (ишлар, хизматлар) экспорт қилишдан валюта тушумларининг 25%ни мажбурий сотиш бўйича талаб бекор қилинади, деб хабар беради Ўзбек телеграф агентлиги (ЎзТАГ).
Бу ҳақида республика президентининг 28 июлдаги “Маҳаллий экспорт қилувчи корхоналарни рағбатлантириш бўйича қўшимча чора-тадбирлар тўғрисида”ги ПҚ-3157 сонли қарорида сўз боради.
Хужжат “2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясига мувофиқ маҳаллий экспорт қилувчи корхоналарни ва фермер хўжаликлар фаолиятини, уларнинг ташқи бозорларда рақобатдош маҳсулотлар ишлаб чиқариш ва экспорт қилишини иқтисодий рағбатлантириш, шунингдек, валюта бозорини янада либераллаштириш мақсадида” қабул қилинган.
Ўзбекистон Республикаси Марказий банкига республика Адлия вазирлиги ҳамда бошқа манфаатдор вазирлик ва идоралар билан биргаликда бир ой муддатда қонун ҳужжатларига ушбу қарордан келиб чиқадиган ўзгартиш ва қўшимчалар тўғрисидаги таклифларни Вазирлар Маҳкамасига киритиш топширилди.
