Ўзбекистонда янги таҳрирдаги Мобил алоқа хизматларидан фойдаланиш қоидалари лойиҳаси муҳокама қилинмоқда
Тошкент. 22 июн. ЎзТАГ – Ўзбекистон Ахборот технологиялари ва коммуникацияларини ривожлантириш вазирлиги мутахассислари томонидан янги таҳрирдаги “Мобил алоқа хизматларини кўрсатиш қоидалари”нинг лойиҳаси ишлаб чиқилди, деб хабар беради Ўзбек телеграф агентлиги (ЎзТАГ).
Вазирлик хужжатни ўз порталида жойлаштирган бўлиб, барчани уни муҳокама қилишга чақирмоқда. Бу ерда амалдаги Мобил алоқа хизматларидан фойдаланиш қоидалари ҳам жойлаштирилган.
“Бугунги кунда мобил алоқа тармоқларининг жадал ривожи ҳамда янги технологияларнинг кенг жорий қилинаётгани бу ёъналишдаги хизмат кўрсатиш тартибини замонга мувофиқлаштириш, жумладан мобил алоқа операторларининг дилерлари фаолиятини тартибга солишни тақозо қилмоқда. Янги таҳрирдаги “Мобил алоқа хизматларини кўрсатиш қоидалари”нинг лойиҳаси айнан шу мақсадларга хизмат қилади”, - дейилади вазирлик хабарида.
Ҳужжат лойиҳаси Ўзбекистон Республикасининг “Фуқаролик кодекси”, Ўзбекистон Республикасининг “Телекоммуникациялар тўғрисида”ги, “Истеъмолчиларнинг ҳуқуқларини ҳимоя қилиш тўғрисида”ги ва “Хўжалик юритувчи субъектлар фаолиятининг шартномавий-ҳуқуқий базаси тўғрисида”ги қонунларига мувофиқ ишлаб чиқилган.
