Ўзбекистонда янги цемент заводи ишга тушди

Тошкент. 29 июн. ЎзТАГ – Қорақалпоғистон Республикасининг Қораузоқ туманида Karakalpak sement янги цемент заводи ишга туширилди, деб хабар беради Ўзбек телеграф агентлиги (ЎзТАГ).

“Лойиҳа уч босқичда амалга оширилади. Унинг умумий қиймати $40 млндан зиёд. $17 млн инвестиция ўзлаштирилган биринчи босқич ҳозирда тўлиқ якунланди, иккинчи босқич йил охирига қадар якунланади. Корхонада 200 киши иш билан таъминланди”, - деб таъкидлашди “Ўзқурилишматериаллари” АКда.

Бугунги кунда корхонанининг умумий қуввати йилига 1,2 млн тонна цементга тенг. Йил охирига бориб ушбу кўрсаткич икки марта ошиши, 2018 йил якунига бориб эса яна йилига 700 минг тоннага кўпайиши режалаштирилган. Биринчи икки босқичда маҳсулот янги технология – вертикаль печка ёрдамида ишлаб чиқарилади. Учинчи босқич янада самаралироқ бўлган айланувчи печкадан фойдаланилган ҳолда ишлаб чиқаришни кўзда тутади.

Корхона ўз маҳсулотларини Қозоғистон ва Туркманистонга экспорт қилишни режалаштирмоқда.