Ўзбекистонда янги “Ўзбекистон 24” куну-тун ишловчи ахборот телеканали ишга туширилади

Тошкент. 25 май. ЎзТАГ – Ўзбекистонда янги “Ўзбекистон 24” куну-тун ишловчи ахборот телеканали ишга туширилади, деб хабар беради Ўзбек телеграф агентлиги (ЎзТАГ).

UZ24 нашрининг Миллий телерадиокомпанияга асосланиб берган маълумотига кўра, бунинг учун “Ўзбекистон” телеканалидаги “Ахборот” ва “Тахлилнома”,  “Тошкент” телеканалидаги “Пойтахт” “Ёшлар” телеканалидаги “Давр” дастурлари ёпилади.

Барча янгилик дастурлари “Ўзбекистон 24” куну-тун ишловчи ахборот телеканалида трансляция қилинади. Янги телеканал “Диёр” канали ва “Тошкент” радиоканали базасида ташкил этилади. Янги телеканалнинг аниқ очилиш вақти ҳали маълум эмас.

“Ахборот”, “Пойтахт” ва “Давр” дастурлари “Ўзбекистон 24” эфирга чиққунга қадар ишлайди.

Эслатиб ўтамизки, МТРК тизимида “Ўзбекистон 24” телеканалининг очилиши ҳақидаги қарор президент Шавкат Мирзиёев томонидан май бошида имзоланган эди.