Ўзбекистонда Япония бизнес делегацияси меҳмон бўлиб турибди

Тошкент. 22 июл. ЎзТАГ – 17-22 июлда Ўзбекистонда Япониянинг Чиба тижорат университети ректори Харуо Шимада бошлиқ бизнес делегацияси меҳмон бўлиб турибди, деб хабар беради Ўзбек телеграф агентлиги (ЎзТАГ).

Республика ССП хабар беришларича, делегация таркибига кимё, электротехника маҳсулотлари ишлаб чиқарувчи ширкатлар, саноат корхоналари, япониянинг молия ва савдо компанияларининг раҳбар ходимлари кирганлар.

Ташрифдан кўзланган мақсад – Ўзбекистоннинг иқтисодиёт модели, тарихи ва маданияти билан танишишдир. Дастурга Самарқанд, Бухоро ва Тошкент шаҳарларига ташриф, шунингдек, вазирлик, муассаса, тадқиқот институт ва университетларда учрашувлар ва тадбиркорлар билан музокаралар ҳам киритилган.

Эслатиб ўтамизки, Чиба тижорат университети 1927 йилда Тижорат мактаби сифатида ташкил этилган. Бугун бу ерда тижорат ва иқтисодиёт, глобал ва ижтимоий тадқиқотлар, хизматлар соҳасида инновациялар йўналишларидаги 5 факультет мавжуд. ОТМ АҚШ, Корея Республикаси, ХХР, Тайван, Вьетнам, Ҳиндистон, Австралия, Буюк Британия, Канада университетлари билан ҳамкорлик қилади.