Ўзбекистонда ёнғин хавфсизлиги қоидаларига ўзгартишлар киритилди

Тошкент. 21 апрел. ЎзТАГ – Ўзбекистон Ички ишлар вазирининг буйруғи билан Кишилар оммавий равишда ташриф буюрадиган объектлар учун ёнғин хавфсизлиги қоидаларига ўзгартишлар киритилди, дея хабар беради Ўзбек телеграф агентлиги (ЎзТАГ).

Вазирнинг буйруғига мувофиқ, эндиликда қишлоқ ҳудудларида яқин орадаги ёнғин депосидан 3 км масофада жойлашган дам олиш уйлари ва бошқа соғломлаштириш муассасалари ёнғин мотопомпаси ёки ёнғинни ўчиришга мослаштирилган техника ёки ускуна билан жиҳозланган бўлиши зарур. Илгари ушбу талаб ёнғин депосидан 50 км олисдаги муассасалар учун қўлланилар эди.

Бундан ташқари, театр, цирк, кинотеатр, маданият саройлари, музейлар, кутубхоналар ва оммавий равишда 1 мингдан ошиқ тўпланадиган стадионларни эксплуатация қилишда ёнғин назорати органларининг рухсати (лицензияси) бўлиши ҳақидаги меъёр чиқариб ташланди.

Шу билан бирга, ёнғин хавфсизлиги қоидаларидан биноларни қайта қуриш ва ўзгартиришни бошлаш, уларнинг вазифаларини ўзгартириш ва реконструкция қилиш, технологик ускуналар ўрнатиш, турар жойларнинг хонадонларида ётоқхоналар ташкил этиш, ёнғин ва портлашдан хавфли моддалар қўлланадиган ва сақланадиган турли устахона ва омборхоналар ташкил қилиш кабилар учун ёнғин хавфсизлиги органининг тегишли рухсатномаси бўлиши ҳақидаги меъёр ҳам бекор қилинди. Ушбу ҳолатлар учун ҳам ёнғин хавфсзлигига риоя қилишнинг умумий тартиблари амал қилади.

Буйруқ 2015 йил 20 июлдан кучга киради.