Ўзбекистонда “Ўзбекбалиқсаноат” уюшмаси ташкил этилади
Тошкент. 3 май. ЎзТАГ – Ўзбекистонда “Ўзбекбалиқсаноат” уюшмаси ташкил этилади, деб хабар беради Ўзбек телеграф агентлиги (ЎзТАГ).
Бу Ўзбекистон президентининг “Балиқчилик тармоғини бошқариш тизимини такомиллаштириш чора-тадбирлари тўғрисида”ги қарорида кўзда тутилган.
Хужжат Ўзбекистон балиқчилик саноатидаги муаммоларни бартараф қилиш мақсадида қабул қилинган.
Янги уюшма таркибига жойларда балиқчилик тармоғи ташкилотлари ишларини мувофиқлаштирувчи 13та ҳудудий “Балиқсаноат” масъулияти чекланган жамияти киради.
Қарорга мувофиқ, Балиқчилик илмий-тадқиқот институти ташкил қилиниб, Айдар-Арнасой кўллар тизимида ҳамда республиканинг бошқа худудларида унинг филиалларини очилади.
Институт балиқчилик тармоғида илмий-тадқиқот ишларини янада такомиллаштириш, илмий кадрлар тайёрлаш, илмий ва техник янгиликларни тадбиркорлик субъектларига етказиш мақсадида очилмоқда.
Ўзбекистон президенти тармоқ лойиҳаларини биргаликда молиялаштириш, шунингдек, маслаҳат, ахборот-таҳлил ва маркетинг хизматлари кўрсатиш йўли билан балиқчиликни ривожлантириш дастурлари амалга оширилишига кўмаклашувчи “Ипотека-банк” акциядорлик тижорат ипотека банкининг инвестицион компаниясини ташкил этишни маъқуллади.
Давлат раҳбари Илмий-тадқиқот, селекция ва наслчилик ишларини молиялаштириш, озуқаларнинг замонавий рецептураларини ишлаб чиқиш ва балиқчилик тармоғига илғор технологияларни жорий этишда кўмаклашиш, балиқларнинг касалликлари профилактикаси ва уларни даволаш ҳамда тармоқни ривожлантириш бўйича инвестиция лойиҳаларини шакллантириш мақсадида “Ўзбекбалиқсаноат” уюшмасида Балиқчиликни ривожлантириш жамғармаси ташкил этилишини ҳам тасдиқлади.
Шавкат Мирзиёев “Ўзбекбалиқсаноат” уюшмасини, унинг ҳудудий “Балиқсаноат” МЧЖ ва уюшма таркибига кирувчи юридик шахсларга солиқ имтиёзлари берди.
Шунингдек, президент 2017-2021 йилларда балиқчилик тармоғини янада комплекс ривожлантириш бўйича дастурий чора-тадбирларни ишлаб чиқиш ҳақида топшириқ берди.
Дастур балиқ етиштириш ва уни қайта ишлаш ҳажмларини кўпайтиришга, балиқ чавоқлари билан таъминлашга, балиқ етиштиришнинг замонавий усулларини жорий этишга йўналтирилади.
