Ўзбекистондаги Қарши-Китоб” темирйўл линиясида поездларнинг тезкор ҳаракати йўлга қўйилади

Тошкент. 12 июл. ЎзТАГ – Ўзбекистондаги Қарши-Китоб” темирйўл линияси электрлаштирилганидан кейин бу йўлда йўловчи поездларнинг тезкор ҳаракати очилади, деб хабар беради Ўзбек телеграф агентлиги (ЎзТАГ).

Бу Ўзбекистон президентининг 10 июлдаги қарорида кўзда тутилган. 

2017-2018 йилларда амалга ошириладиган лойиҳанинг қиймати $58,87 млнни ташкил этади.

Лойиҳа “Ўзбекистон темир йўллари” АЖнинг $18,58 млн, “Ўзбекэнерго” АЖнинг $7,31 млнлик, 2018 йилги давлат бюджетидан 50 млрд сўм ($14,06 млн) марказлашган сармоялар, шунингдек, Ўзбекистон Республикаси Тикланиш ва тараққиёт Жамғармасининг $18,92 млнлик кредити ҳисобига молиялаштирилади. 

Лойиҳанинг барча иштирокчиларига 2019 йил 1 январгача божхона ва солиқ имтиёзлари берилган.

Бундан ташқари, лойиҳа доирасида фермер хўжаликлари ва фуқароларни кўчириш билан боғлиқ компенсациялар маҳаллий бюджет ва бошқа манбалар ҳисобидан қопланади.

Эслатиб ўтамизки, 2012-2015 йилларда Самарқанддан Қаршигача йўл электрлаштирилиб, юқори тезликдаги “Тошкент-Самарқанд-Қарши” йўналишида Afrosiyob поезди қатнови йўлга қўйилган эди.​