Ўзбекистондаги банк аҳолининг ҳар 10тасидан деярли 8таси кичик бизнес ва хусусий тадбиркорлик соҳасида меҳнат қилади
Тошкент. 18 январ. ЎзТАГ – Ўзбекистондаги банк аҳолининг ҳар 10тасидан деярли 8таси кичик бизнес ва хусусий тадбиркорлик соҳасида меҳнат қилади, деб хабар беради Ўзбек телеграф агентлиги (ЎзТАГ).
“...Ана шу йўналишдаги ислоҳотлар натижасида ялпи ички маҳсулотимизда кичик бизнес ва хусусий тадбиркорликнинг улуши 2000 йилдаги 31% бугунги кунда 56,7% етгани ёки 1,8 баробар ошганини алоҳида таъкидлашни истардим. Ҳозирги пайтда ушбу соҳада жами саноат маҳсулотларининг учдан бир қисми, қишлоқ хўжалиги маҳсулотларининг 98% ишлаб чиқарилмоқда. Иш билан банд жами аҳолимизнинг 77% ортиғи мазкур тармоқда меҳнат қилади”, - дейилади Ўзбекистон Президенти Ислом Каримовнинг Вазирлар Маҳкамаси мажлисидаги маърузасида.
Шунингдек, давлат раҳбари мамлакатнинг глобал рейтинглардаги муваффақиятлари ҳақида ҳам тўхталиб ўтди.
“Шуни ҳам таъкидлашимиз зарурки, мамлакатимизда ишбилармонлик муҳитини яхшилаш борасида олиб бораётган ишларимиз халқаро иқтисодий ташкилотларнинг рейтингларида ўзининг ижобий ифодасини топмоқда. Ўтган йилнинг октябр ойида Жаҳон банки «Бизнес юритиш» рейтингини эълон қилди. Ана шу рейтингда Ўзбекистон фақат бир йилнинг ўзида 16 поғонага кўтарилиб, 87-ўринни эгаллади. Шуни алоҳида қайд этиш керакки, «янги бизнесни қўллаб-қувватлаш» деб аталадиган мезон бўйича мамлакатимиз айни пайтда жаҳонда 42-ўринни, тузилган шартномалар ижросини таъминлаш бўйича 32-ўринни, иқтисодий ночор корхоналарга нисбатан қўлланадиган банкротлик тизимининг самарадорлиги бўйича 75-ўринни эгаллаб турибди. «Кичик бизнес субъектларига кредит бериш» деб номланадиган кўрсаткич бўйича Ўзбекистон сўнгги уч йилда 154-ўриндан 42-ўринга кўтарилди ва ўтган йилнинг ўзида рейтингини 63 позицияга яхшилади”, - деб таъкидлади И.Каримов.
Жаҳон банкининг маърузасида Ўзбекистон кейинги йилларда тадбиркорлик фаолияти учун ишбилармонлик муҳитини яхшилаш соҳасида энг яхши натижаларга эришган дунёдаги ўнта давлат қаторидан жой олгани қайд этилган.
