Ўзбекистондаги божхона декларацияларининг 99,9% интернет орқали топширилмоқда
Тошкент. 19 октябр. ЎзТАГ – 2016 йилнинг 9 ойи якунлари бўйича Ўзбекистондаги божхона декларацияларининг 99,9% интернет орқали электрон шаклда тақдим этилган, деб хабар беради Ўзбек телеграф агентлиги (ЎзТАГ).
“Бу божхона расмийлаштируви тартибларидан ўтиш вақтини 2013 йилга нисбатан 4,7 баробарга қисқартиришга имкон берди. Агар олдин юкларни божхонада расмийлаштириш учун ўртача 8,5 кун вақт сарфланган бўлса, бугунги кунда ушбу жараён 1,8 кун вақт кетмоқда. Бундан ташқари, 2013 йилда агар тадбиркорлар томонидан 1 млрд 229 млн сўм миқдорида маблағ божхона юк декларацияларининг қоғоз бланкаларига сарфланган бўлса, 2014 йилда бошлаб бу йўналишдаги ҳаражатларига барҳам берилди. Ҳужжатларини электрон тақдим этиш натижасида тадбиркорлар томонидан ҳар йили 60 тоннага яқин қоғоз иқтисод қилинмоқда”, – деб таъкидланади Давлат божхона қўмиатси хабарида.
Божхонадаги янги хизматлардан бири – Тадбиркорлик фаолияти субъектларининг ташқи савдо операцияларининг ягона тизими бўлиб, у Ўзбекистон вазирлик ва муассасаларининг узлуксиз алоқасини таъминлайди. Ўтган 2015 йилда жами шартномаларнинг 99,9%, яъни 137 мингдан ортиқ шартнома ва уларга қўшимча битимлар электрон шаклда рўйхатдан ўтказилди. Жорий йилнинг 9 ойида эса бу кўрсаткич 76,7 мингдан ошди.
2015 йилнинг 1 декабридан бошлаб божхонада “Ўзбекистон Республикасининг божхона чегараси орқали товарлар ва транспорт воситаларини автомобиль транспортида олиб ўтишда юк ташувчилар томонидан олдиндан маълумот тақдим этиш” интерактив хизмати жорий этилган эди.
Мазкур хизмат тури ҳам тадбиркорлар орасида оммалашиб, жорий йилнинг ўтган 9 ойи мобайнида тадбиркорларимиз томонидан божхона органларига 77 мингдан ортиқ маълумотлар олдиндан электрон тарзда тақдим этилди, бу чегарадан ўтган жами юк ташувчи автотраспорт воситаларининг 84,8%ни ташкил этди.
