Ўзбекистондаги энг йирик шакар ишлаб чиқарувчи энди очиқ компания эмас

Тошкент. 4 июл. ЎзТАГ – “Xorazm Shakar” очиқ акционерлик жамияти акционерларининг навбатдан ташқари йиғилишида компания номини ўзгартиш, шунингдек, янги акциялар чиқаришга қарор қилинди, дея хабар беради Ўзбек телеграф агентлиги (ЎзТАГ)
Қарорга мувофиқ, компания эндиликда “Акционерлик жамияти шаклидаги “Xorazm Shakar” қўшма корхонаси” деб аталади.
Шунингдек, мажлисда акцияларни бўлиш ва уларнинг номинал қийматини ўзгартиш тўғрисида келишилди. Эндиликда бир акция номинали олдинги 10 минг сўм ўрнига 5 минг сўм бўлиб, акциялар сони 2 бараварга кўпайтирилади. Янги чиқарилган акциялар компания акционерлари орасида ёпиқ обуна шаклида жойлаштирилади. 2,84 млн дона янги акция чиқариш режалаштирилмоқда. Ўз навбатида, қимматли қоғозлар эмиссиясининг тўлиқ миқдори 14,2 млрд сўмни ($6,13 млн) ташкил этади.
Эслатиб ўтамизки, “Xorazm shakar” ҚК 1998 йилда ишга туширилган ва мамлакатдаги энг йирик шакар ишлаб чиқарувчи корхона ҳисобланади. Корхона акционерлари Motril Investments (Панама, 69,43%), KITO Investments (Сингапур, 20%), SEID Handels GmbH (Австрия, 10%) компаниялари ва корхона коллективи ҳисобланади (0,57%).